BAKI, 12 sentyabr — Sputnik. Sputnik Beynəlxalq İnformasiya Agentliyi və Radiosu avqustun əvvəllərində "Məktəbə getmək ümidi ilə" sosial aksiyasını başladıb. Bu layihə çərçivəsində aztəminatlı ailələrin uşaqlarını bütün zəruri məktəb ləvazimatları ilə təmin etmək planlaşdırılıb. Layihədə uşaqlarına məktəb ləvazimatları almaq imkanı olmayan iki ailə iştirak edib.
Bu cür ailələrdən biri tənha ana, altı yaşlı qızı Fəridəni və iki yaşlı oğlu Yusifi tək böyüdüb tərbiyə edən Səfurə Məmmədovanın ailəsidir. Bu gün balaca Fəridə artıq məktəbə tam hazırdır. Bundan başqa, Sputnik Azərbaycan-ın yaydığı materiallardan sonra adlarının çəkilməsini istəməyən xeyriyyəçilər qızın ailəsinin yaşadığı yarı qəzalı vəziyyətdə olan evin təmiri üçün yardım təklif ediblər.
Layihədə iştirak edən ikinci ailə Laçın rayonundan olan məcburi köçkün Şəfaqət İmranovanın ailəsidir. Qadın və onun üç uşağı - 15 yaşlı Aysu, 10 yaşlı Ayxan və Aydan nəinki işğal nəticəsindən doğma yurdlarından didərgin düşüblər, həm də məişət zorakılığına məruz qalıblar. Ailənin maddi vəziyyəti elədir ki, onlar hətta məktəbə gedə bilmirlər.
Sputnik Azərbaycan-ın aksiyası xeyirxah insanlar arasında əks-səda doğurub, onların çoxu bu ailəyə maddi yardım göstərmək istədiklərini bildiriblər. Adının açıqlanmasını istəməyən xeyirxah insanlar bu ailənin uşaqları üçün məktəb formaları, çantalar, qələmlər, idman formaları, geyim, ayaqqabı və bir çox başqa zəruri ləvazimatları alıblar. Rəsm çəkməkdən zövq alan Ayxan üçün məxsusi olaraq əlavə albomlar, rəngli karandaş dəsti və boyalar alınıb. Bundan əlavə, uşaqlarla iş üzrə ixtisaslaşmış reabilitasiya mərkəzinin psixoloqu məişət zorakılığına məruz qalmış bu uşaqlara təmənnasız yardımını təklif edib. Gənclər təşkilatlarının könüllüləri isə Aysuya ali məktəbə hazırlaşmaq üçün öz yardımlarını təklif ediblər.
Bu gün Aysu, Ayxan və Aydan gələcəyə ümidlə baxırlar və sevinclə məktəbdə dərslərin başlamasını gözləyirlər. İndi onlar məktəbə çəkinmədən, başlarını dik tutaraq gedə biləcəklər.
Sputnik Azərbaycan aksiyaya qatılan, uşaqları sevindirən və onların işıqlı gələcəyinə ümid bəxş edən hər kəsə minnətdarlığını bildirir.
Sputnik Azərbaycan 2015-ci ilin may ayından ölkəmizdə fəaliyyətə başlayıb. Agentlik Azərbaycan və rus dillərində informasiya portalı, radioresurs və yüksək texnologiyalı multimedia mərkəzinə malikdir. Agentliyin internet portalı ölkənin ən çox oxunan KİV-nin TOP-5-liyinə (LiveInternet-in 25 fevral 2019-cu il tarixinə olan məlumatına görə) daxildir.
Sputnik Azərbaycan onlarla ölkədə informasiya və multimediya bölmələri fəaliyyət göstərən xəbər agentliyi və radionun tərkibinə daxildir. Sputnik 32 dildə ölkə və regional multimedia resursu və internet saytları, mobil tətbiqləri və sosial şəbəkələrdə səhifələri özündə birləşdirən, rus, ingilis, fransız və digər dillərdə dünyanın 90 şəhərində analoq və rəqəmsal radioyayım edən nəhəng KİV-lərdən biridir. Sputnik xəbər lenti bütün dünya üzrə aparıcı nəşrlərə sutka boyu ingilis, ərəb, ispan, çin və fars dillərində informasiya göndərir. Sputnik-in informasiya resurslarının auditoriyası ayda 60 milyon ziyarətçidən ibarətdir, Veyboda Sputnik China hesabının abunəçilərinin sayı 10,5 milyonu aşır. Pekindən Montevideoya qədər bütün dünyadakı 22 redaksiya mərkəzində onlarla millətin minlərlə nümayəndəsi çalışır. Sputnik "Rossiya seqodnya" mediaqrupuna daxildir. Sputnik-in baş ofisi Moskvada yerləşir.
