BAKI, 7 sentyabr — Sputnik. Nyu-York Prokurorluğu "Facebook"la bağlı təhqiqata başlayıb.
Sputnik Azərbaycan "Bloomberght"ə istinadla xəbər verir ki, "Facebook" inhisarçılıqda ittiham olunur.
Nyu-York prokuroru Letitia Ceyms deyib ki, təhqiqat zamanı "Facebook"un sektordakı hakimiyyəti və bu hakimiyyətdən qaynaqlanan rəqabətə zidd davranışları araşdırılacaq: "Dünyanın ən böyük sosial media platforması qanunlara tabe olmalı və istehlakçılara hörmət etməlidir. "Facebook"un rəqabətə mane olub-olmadığını və istifadəçiləri təhlükəyə atıb-atmadığını araşdıracağıq".
Qeyd edək ki, ABŞ Federal Ticarət Komissiyası iyul ayında şəxsi məlumatları icazəsiz və qanunsuz istifadə etmə səbəbi ilə "Facebook"a 5 milyard dollar cəza kəsmişdi. Hadisə ilə bağlı "Facebook"un rəhbəri Mark Zukenberq Senatda ifadə vermişdi.
