BAKI, 2 sentyabr — Sputnik. Gələn il Azərbaycanda kartof və tərəvəz istehsalçıları hər hektar əkin sahəsinə görə dövlətdən 240 manat subsidiya alacaqlar.
Sputnik Azərbaycan bu barədə Kənd Təsərrüfatı Nazirliyinə istinadən xəbər verir.
Bununla bağlı qərar Aqrar Subsidiya Şurasının avqustun 29-da keçirilmiş iclasında, Prezident İlham Əliyevin bu il iyunun 27-də təsdiqlədiyi "Kənd təsərrüfatı məhsulları istehsalının subsidiyalaşdırılması qaydası"na əsasən qəbul edilib. Qərara əsasən, fermerlərə subsidiya verilməsi üçün müxtəlif bitki növləri üzrə əkin əmsalları müəyyən edilib. Kartof və tərəvəz üzrə əmsal 1,2 müəyyən edilib.
Bostan bitkilərinin istehsalçılarına isə hər hektar əkin sahəsinə görə 220 manat subsidiya ödəniləcək. Bu bitkilər üzrə əkin əmsalı 1,1 müəyyən edilib.
