BAKI, 31 avqust — Sputnik. Daxili İşlər Nazirliyi (DİN) Ələt-Astara avtomobil yolunun 80-ci kilometrliyində üç avtomobilin toqquşması ilə nəticələnən ağır yol qəzası ilə bağlı yayılan məlumatlara aydınlıq gətirib.
Sputnik Azərbaycan Report-a istinadla xəbər verir ki, DİN-in Mətbuat xidmətinin şöbə rəisi, polis polkovniki İlham Babayev açıqlamasında qəzanın zəncirvari şəkildə baş verməsi ilə bağlı yayılan məlumatların həqiqəti əks etdirmədiyini bildirib:
“Avqustun 30-da saat 20:00 radələrində Ələt-Astara yolunun 80-ci kilometrliyində, Biləsuvar rayonunun ərazisində Bakı şəhər sakini Səadət Fərəczadənin idarə etdiyi “Hyundai” markalı minik avtomobili yolun kənarındakı maneəyə dəyərək aşıb. Nəticədə sərnişinlərdən ikisi – S.Fərəczadənin oğlu Səfər və qardaşı oğlu Riyad Hüseynov hadisə yerində ölüblər. Sürücü ilə birlikdə daha 4 sərnişin - sürücünün qızları – Nigar və Fidan, həmyerliləri Günel Hüseynova və onun azyaşlı oğlu Rafiq Hüseynzadə müxtəlif dərəcəli bədən xəsarətləri ilə xəstəxanaya yerləşdiriliblər. G.Hüseynovanın vəziyyəti ağır olduğundan onun həyatını xilas etmək mümkün olmayıb”.
