BAKI, 14 avqust — Sputnik. Dövlət başçısının tapşırığına əsasən, Məhəmməd Hadi küçəsində yol hərəkətinin təhlükəsizliyinin artırılması, fövqəladə hallar zamanı operativ nəqliyyat vasitələrinin sərbəst hərəkətinin təmin edilməsi məqsədilə Bakı Nəqliyyat Agentliyi (BNA) tərəfindən yol infrastrukturunda bir sıra dəyişikliklər həyata keçirilir.
Bu barədə Sputnik Azərbaycan-a BNA-dan məlumat verilib. Xəbərdə bildirilir ki, nəzərdə tutulan işlər çərçivəsində Məhəmməd Hadi küçəsində layihələndirmə işləri aparılıb. Bu zaman müasir küçə dizaynının elementlərindən istifadə edilib. Əsas dəyişikliklər səkilərin yolun hərəkət hissəsinə doğru genişləndirilməsi vasitəsilə təşkil ediləcək ki, bunun da bir sıra üstünlükləri vardır.
Bakı son onilliklərin ən böyük dəyişikliyi ərəfəsində, paytaxt "kiçiləcək"
Planlaşdırılan dəyişikliyin əsas üstünlükləri isə aşağıdakılardır:
• Piyadalar üçün piyada keçid məsafəsinin azaldılması və gözləmək üçün daha geniş səkinin təmin edilməsi;
• Ərazidə müşahidə edilən xaotik parklanma vəziyyətinin nizamlanması;
• Yol kəsişmələrində nəqliyyat vasitələri üçün münasib dönmə radiuslarının təşkili;
• Avtobus və taksi minik avtomobilləri üçün xüsusi yerlərin ayrılması.
Qeyd edək ki, işlərin bu ay ərzində yekunlaşması nəzərdə tutulub. Analoji tədbirlər yol infrastrukturunun imkan verdiyi digər küçələrdə də icra ediləcək.
