BAKI, 8 avqust — Sputnik. Türkiyənin sabiq baş nazirinin müavini və xarici işlər naziri Əli Babacan yeni partiya qurmaq üçün işlərə başladığını bəyan edib. Bu barədə Sputnik Türkiyə xəbər verir.
"İnsan haqları və azadlıqları məsələsində ən yüksək standartlar, hüququn üstünlüyünü, ətraf mühiti qorumaq üçün güclü bir iradə ortaya qoymaq ölkəmiz üçün yenidən bir ehtiyac halına gəlib. Ötən ay verdiyim açıqlamadan sonra xeyli sayda vətəndaşımız bizə dəstək vermək üçün iradəsini ortaya qoydu. Başlatdığımız çalışmalar barədə qarşıdakı vaxtlarda cəmiyyəti məlumatlandırmağa davam edəcəyik. İnancımız budur ki, səmimiyyətlə və birgə işlədikdə ölkəmizin həll edə bilməyəcəyi məsələ yoxdur", - Babacan qeyd edib.
Xatırladaq ki, ötən ay Türkiyənin sabiq baş nazirinin müavini və xarici işlər naziri Əli Babacan qurucularından olduğu Ədalət və İnkişaf Partiyasının (AKP) sıralarından 18 il sonra istefa verdi.
— yurdagül şimşek (@yurdagulsimsek) August 8, 2019
Babacan istefasına dair yazılı açıqlamasında eyni zamanda yeni partiya yaratmaq hazırlıqları ilə bağlı ilk rəsmi məlumatı da paylaşıb:
"Son illərdə bir sıra sahələrdə atılan addımlarla mənim inandığım dəyər və fikirlər arasında dərin fərqliliklər formalaşıb. Bu dönəmdə də Türkiyə yeni sınaqlarla qarşı-qarşıya qaldı. Ölkəmizdə isə parlaq bir gələcək vəd edən, başqa gözləntiləri olan dinamik, yeni nəsillərimiz var. İçərisində olduğumuz şərtlərdə Türkiyə üçün yeni bir gələcək planlaşdırılmalıdır. Ölkəmizdə hər sahədə doğru analizlər, yenidən düşünülmüş strategiyalar, planlar, proqramlar mövcuddur. Cəmiyyətin müxtəlif təbəqələri ilə apardığımız məsləhətləşmələr də bunu təsdiqləyir".
Qeyd edək ki, daha əvvəl Türkiyə KİV-də yayılan məlumata görə, Türkiyədə Əhməd Davudoğlunun rəhbərliyi ilə yeni partiya yaradılacaq. Məlumata əsasən, yeni partiyanın yaradılmasında baş nazirin sabiq müavini Əli Babacan da iştirak edəcək.
Partiya yaxın iki ayda yaradılacaq. Partiyanın siyasi istiqaməti barədə məlumat verilmir.
Xatırladaq ki, Əhməd Davudoğlu 2014-cü ilin avqustundan 2016-cı ilin mayına qədər Türkiyənin baş naziri olub. Həmin müddətdə o, həmçinin Ədalət və İnkişaf Partiyasına rəhbərlik edib.
