BAKI, 29 iyul — Sputnik. Bu gün səhər saat 10.00-dan etibarən Bakı-Sumqayıt yolunun "Şamaxinka" adlanan ərazisindən və Biləcəri enişindən keçən hissəsində təmir-tikinti işlərinə start verilib.
"Azəriqaz" İB-dən Sputnik Azərbaycan-a verilən məlumata görə, əraziyə texnika və işçi heyət cəlb olunub.
Diametri 530 mm olan orta təzyiqli 2 ədəd yeraltı qaz kəmərinin sürüşmə zonasında yerləşməsi və s. amillər nəzərə alınaraq istismara yararsız hissəsinin əsaslı təmir olunmasına zərurət yaranıb.
Haqqında danışılan qaz kəməri ötən əsrin 70-ci illərində istismara verilib, həmin yerdə avtomobil tunelinin tikintisi ilə əlaqədar 2004-cü ildə trayektoriyası dəyişdirilib. Artıq qazıntı işlərinə başlanılıb və "Azəriqaz" İB-nin əməkdaşları qeyri-iş günlərində də təmir-tikintiyə cəlb olunacaqlar. Ərazidə nəqliyyat vasitələrinin hərəkətinə tətbiq olunan məhdudiyyətləri Bakı şəhər Dövlət Yol Polisi İdarəsi tənzimləyir.
"Azərbaycan Avtomobil Yolları Dövlət Agentliyi"ndən Sputnik Azərbaycan-a verilən məlumatda isə təmirlə əlaqədar olaraq həmin yolda sürət həddinin endirildiyi, lakin hərəkətin məhdudlaşdırılmadığı bildirilib.
