BAKI, 26 iyul — Sputnik. Azərbaycan Dövlət Akademik Opera və Balet Teatrının aparıcı solisti, Əməkdar artist, "Humay" milli mükafatı laureatı Afaq Abbasova İtaliyada keçiriləcək Beynəlxalq "Tagliacozzo" Festivalında çıxış etmək üçün dəvət alıb.
Sputnik Azərbaycan xəbər verir ki, Əməkdar artist avqustun 1-də 35-ci dəfə keçiriləcək bu mötəbər tədbirin açılış mərasimində çıxış edəcək, İtaliyanın tanınmış vokalçıları ilə eyni səhnəni bölüşəcək.
Son illərdə İtaliyanın Azərbaycandakı Səfirliyi ilə Azərbaycan Dövlət Akademik Opera və Balet Teatrı arasında qarşılıqlı əlaqələr çərçivəsində layihələr gerçəkləşdirilir. İtaliyadan dəvət olunmuş dirijor və vokalçılar Opera və Balet Teatrının səhnəsində çıxış edirlər, teatrda italiyalı sənətkarlar və vokal ustalarının yaradıcılığını əks etdirən sərgilər təşkil olunur.
Qeyd edək ki, gənc vokalçımız Afaq Abbasova azərbaycanlı vokalçılar arasında ilk dəfə belə mötəbər tədbirə dəvət alıb.
