BAKI, 26 iyul — Sputnik. Mütəxəssislər iOS platformasında WhatsApp əlavəsində bir sıra yeni funksiyaları test edirlər. Sputnik Azərbaycan RİA-Novosti-yə istinadən bildirir ki, bu barədə WABetaInfo portalı xəbər yayıb.
Yeniliklər mesencerin 2.19.80.16 beta-versiyasında işə salınır və rəsmi yenilənməyə daxil ediləcək.
Çatlarda mesajların alınmasında problemlərin olduğu barədə xəbərdarlıqlar yayılacaq. Bildirişlərdə nasazlıqların aradan qaldırılması üçün əlavəni yeniləmək tövsiyə olunacaq.
Bundan əlavə, WhatsApp alınan və ya göndərilən multimedia fayllarının sürətl redaktəsi funksiyasını da test edir. Bu funksiya həm iOS, həm də Android platformalarında işləyəcək. Bu yeniliyin sayəsində mesencerdən çıxmadan təsvirlərə dəyişiklik etmək mümkün olacaq. Bu, telefonun yaddaşına qənaət etməyə imkan yaradacaq, yəni telefonda izafi mediafayl saxlamağa gərək qalmayacaq. Eyni zamanda, dəyişdirilmiş şəkillər ilkin fotoları əvəz etməyəcək.
WhatsApp komandası push-bildirişlərdə səsli mesajların ilkin dinlənilməsi variantını da reallaşdırmaq istəyindədir. Ancaq bu funksiyanın nə vaxt işə salınacağı sual altındadır.
Portalın yazdığına görə, ola bilsin, sonralar mesencer smartfondan asılı olmayaraq bir neçə cihazda işləsin. Amma bu zaman istifadəçinin bir qeydiyyat hesabından istifadə olunacaq.
