BAKI, 25 iyul — Sputnik. Bu günlərdə Emin Ağalarovun yeni yay hiti "Nejnaya"nın premyerası olub. Klipin çəkilişləri günəşli Dominikan Respublikasında aparılıb. Videonun rejissoru Cenifer Lopes, Enriki İqlesias, Maluma və digər dünya şöhrətli ulduzlarla işləmiş Cessi Terrerodur.
Klipin baş qəhrəmanı rolunu "Miss Dominikan Respublikası -2017" (Miss Mundo República Dominicana 2017) titulunun sahibi, model Aleksa Muyzes (Aletxa Mueses) oynayıb.
Qeyd edək ki, bu, Eminin dünyanın ən effektiv qızları ilə çəkdirdiyi ilk klip deyil. O, 2012-ci ildə "Amor" mahnısının klipinə "Kainat gözəli" Oliviya Kalponu, 2013-cü ildə ekranlara çıxan "In Another Life" mahnısının klipinə isə həmin ilin "Miss World" müsabiqəsinin üç iştirakçısını birdən çəkdirib.
İyunun 23-də müğənninin Youtube-dakı rəsmi səhifəsində yerləşdirilən "Nejnaya" mahnısının klipini iki gün ərzində 1,2 milyona yaxın insan izləyib. Bu mahnı klipdən daha çox bəyənilib. Sosial şəbəkə izləyiciləri arasında klipdə oynayan qızın heç də mahnıda deyildiyi kimi "incə" olmadığını qeyd edənlər olub. Hətta "Dominikan gözəlindənsə, öz həyat yoldaşı Alyona Qavrilovanı çəksəydi, daha effektiv olardı" deyənlər də tapılıb. Amma Eminin ekzotika həvəskarı olduğu hər kəsə məlumdur. Onun dominikanlı gözəli niyə seçdiyi də, hər zaman ətrafında gözəl qızların dolaşdığı da pərəstişkarlarına sirr deyil.
