Şəkidə xəsarət alan İlkindən xəbər var

Nigar İsgəndərova, Sputnik Azərbaycan

BAKI, 17 iyul — Sputnik. Xəbər verdiyimiz kimi, iyulun 14-də saat 12 radələrində Şəki Xan Sarayının qarşısında təxminən 500 yaşı olan çinar ağaclarından birinin budağının qırılaraq yerə düşməsi 19 nəfərin xəsarət almasına səbəb olub. Xəsarət alanlar arasında həm yerli, həm də xarici vətəndaşlar var.

 Bu xəstələrdən 3-ü əcnəbi, 1-i azərbaycanlı olmaqla 4-ü elə hadisə baş verən günün axşam saatlarında helikopterlə Bakıya, 1 saylı Kliniki Tibbi Mərkəzə yerləşdirilib. İyulun 15-də isə həmin əcnəbi vətəndaşlar öz istəkləri ilə digər xəstəxanaya köçürülüblər.

Hazırda 1 saylı Kliniki Tibbi Mərkəzdə müalicə alan jurnalist İlkin Məmmədovla bağlı son durumu öyrənmək üçün həmin tibb müəssisəsinə üz tutduq.

1 saylı Kliniki Tibbi Mərkəzin Cərrahi Tədris şöbəsinin müdiri Aydın Əlizadə Sputnik Azərbaycan-a açıqlamasında ötən gün reanimasiyadan palataya köçürülən xəstənin son durumu ilə bağlı məlumat verib: "Ötən günlə müqayisədə İlkinin vəziyyəti stabilləşib. Müalicəsini davam etdiririk. O, müalicə olunub sağalandan sonra evə buraxılacaq".

"Onun bu tezlikdə evə buraxılması gözlənilmir. Çünki sonradan evə gedərək ağrılarının olmaması, başqa problemlərin yaranmaması üçün həkimlər onu nəzarətdə saxlayırlar", - deyə həkim əlavə edib.

İ.Məmmədovun özünü necə hiss etməsi ilə bağlı olaraq isə həkim bunları deyib: "Xəstəxanada olan biri özünü necə hiss edə bilər? İlkin də özünü elə hiss edir.

 Ancaq evə gedən, dost-tanışlarının ətrafında olan biri özünü yaxşı hiss edə bilər. İlkində psixoloji travmadır. Hadisə yadına düşəndə bir qədər həyəcanlanır. Bu hadisə gözlənilməz anda baş verib və istər-istəməz həmin olay onda psixoloji travma yaradıb".

Qeyd edək ki, iyulun 15-də, axşam saatlarında sağ baldır sümüyünün çox qəlpəli sınığı diaqnozu qoyulan xəsarət alanlardan biri, 1987-ci il təvəllüdlü Xatirə Ağamalıyeva dünyasını dəyişib.

Xatırladaq ki, baş vermiş hadisə ilə bağlı olaraq Şəki Rayon Mərkəzi Xəstəxanasına ümumilikdə 19 nəfər müraciət etmişdi.