BAKI, 13 iyul — Sputnik. Kiyevdə "112.Ukrayna" telekanalının binası qumbaraatandan atəşə tutulub. Sputnik Azərbaycan telekanalın yaydığı məlumata istinadən xəbər verir ki, insident Deqtyarivska küçəsində gecə saat 03:40-da baş verib.
Hücum edənlərin iki nəfər olduğu bildirilir. Onlar hadisə yerindən qaçaraq gizləniblər.
Hadisə nəticəsində xəsarət alan olmayıb, lakin binanın fasadına ziyan dəyib. Polis hücum edənlərin axtarışına başlayıb və terror aktı üzrə cinayət işi açıb.
RİA Novosti xəbər verir ki, dünən "112.Ukrayna" telekanalı "Ukraynanın Danışılmamış Hekayəsi" (Revealing Ukraine) filmini nümayiş edəcəyini elan edib. Filmdə amerikalı rejissor Oliver Stoun və ukraynalı sənədli film müəllifi İqor Lopatyonok ölkədə hökm sürən böhranın səbəblərini araşdırmağa çalışıb.
Film üçün Stoun Rusiya Prezidenti Vladimir Putindən eksklüziv müsahibə alıb. Müsahibə zamanı Kerç boğazında baş vermiş insident də müzakirə olunub.
Ukraynanın Baş Prokuroru Yuri Lutsenko filmi nümayiş edəcəyi təqdirdə kanalın məsuliyyət daşıyacağını bildirib. Bundan başqa, "112.Ukrayna" telekanalı deyib ki, onlara qarşı təhdidlər və təzyiqlər edilir. Bu səbəbdən telekanal beynəlxalq hüquq mühafizə təşkilatlarına, Avropa Komissiyasına, AŞPA-ya, Aİ-yə və BMT-yə müraciət edib.
