BAKI, 10 iyul — Sputnik. Ermənistanın sabiq prezidenti Serj Sarqsyan 2016-cı ilin aprelində Dağlıq Qarabağda baş verənlər barədə məlumat verməsi üçün parlamentə dəvət olunacaq. Sputnik Ermənistan xəbər verir ki, bu barədə Ermənistanın "Johovurd" (Xalq) nəşri məlumat yayıb.
Nəşr yazır ki, ötən gün Ermənistan parlamentində Qarabağda dördgünlük müharibə zamanı vəziyyətin öyrənilməsi üzrə İstintaq Komissiyasının iclası keçirilib.
Nəşrin məlumatına görə, iclas dinləmə cihazlarının olmadığı xüsusi otaqda keçirilir. İnformasiya sızıntısının qarşısının alınması üçün iclasdan əvvəl iştirakçıların telefonları yığılır. Lakin qəzet qapalı rejimdə baş tutan iclasın bəzi detallarını öyrənə bilib.
Məlum olub ki, komissiya yaxın vaxtlarda parlamentə gəlməli olan şəxslərin siyahısını artıq Ermənistanın Müdafiə Nazirliyinə göndərib. Bu siyahıya, həmçinin Ermənistanın sabiq prezidenti Serj Sarqsyanın da adı daxil edilib.
Yeri gəlmişkən, məlum olub ki, bu cür iclasa qondarma "Dağlıq Qarabağ Respublikası"nın da nümayəndələri dəvət olunacaqlar.
