Nigar Məhərrəm, Sputnik Azərbaycan
BAKI, 21 iyun — Sputnik. Xalq artisti, xanəndə Canəli Əkbərov xəstəxanaya yerləşdirilib. Artıq 4-5 gündür ki, Mərkəzi Klinik Xəstəxanada müalicə alan Xalq artistinin durumunu öyrənmək üçün onunla əlaqə saxladıq. C.Əkbərov Sputnik Azərbaycan-a açıqlamasında ağrılarından, özünü necə hiss etməsindən danışıb: “Siz necə istəsəz, özümü o cür hiss edirəm. Nə bilim, hərdən ağrıyıram. Ağrımayan yerim də var, ağrıyan yerim də var".
O həkimlərin ona dəqiq diaqnoz qoymadığını vurğulayıb: "Sabahda, biri gündə əməliyyat olunmalıyam. Buna görə mənə hər gün nə qədər iynə vurulur, dərman verilir. Amma hələ ki, vəziyyətimlə bağlı dəqiq diaqnoz qoyulmayıb".
Xalq artisti sağalmağa ümidli olduğunu deyib: "Ümid edirəm ki, sağalacağam. Ürəyim döyünür. Ürəkdir də, deyir ki, sağalacağam”.
Lakin aktyorun oğlu Samir Əkbərov isə atasına insult diaqnozunun qoyulduğunu, sadəcə olaraq xəstənin özünə bu haqda məlumat verilmədiyini bildirib: “Atama ürək insultu diaqnozu qoyulub. Yəqin ki, bir neçə günə atam ürəyindən əməliyyat olunacaq”.
“Şəkərlə əlaqədar olaraq atamın ayaqlarında da müəyyən problemlər yaranıb. Səhhətinin birdən-birə pisləşməsi isə ehtimal ki, yaşı ilə əlaqədardır” – deyə S.Əkbərov əlavə edib.
