Rahim Zakiroğlu, Sputnik Azərbaycan
BAKI, 14 iyun — Sputnik.
Lənkəran şəhərində məzunlar avtomobil qəzasına uğrayıblar. Sputnik Azərbaycan-ın bölgə müxbirinin əldə etdiyi məlumata əsasən, qəza hadisəsi axşam saatlarında Lənkəran şəhərinin Heydər Əliyev prospektində baş verib.
Belə ki, hadisənin iştirakçısı olan qara rəngli "VAZ- 2107" markalı avtomobili Rövşən adlı şəxs idarə edib. Qəzaya səbəb isə sürücünün avtomobillə təhlükəli manevrlər etdikdən sonra idarəetməni itirməsi olub. Nəticədə avtomobil yoldan çıxaraq aşıb.
Qəza nəticəsində yaralanan Lənkəran şəhəri M.F.Axundov küçəsi, ev 13-də yaşayan 2001-ci il təvəllüdlü Adil Həsənzadə Lənkəran Rayon Mərkəzi Xəstəxanasına çatdırılıb. A.Həsənzadəyə baş nahiyəsinin əzilməsi, sağ qulağın yerindən qopması və daxili orqanların zədələnməsi diaqnozu qoyularaq reanimasiya şöbəsinə yerləşdirilib. Yaxınlarının bildirdiklərinə əsasən, avtoqəza zamanı Adil Həsənzadədən başqa avtomobildə daha üç məktəbli də olub. Lakin onlar xəstəxanaya müraciət etməyiblər. Xəsarət alan A.Həsənzadənin Lənkəran şəhəri 5 saylı tam orta məktəbin məzunu olduğu bildirilir.
Faktla bağlı araşdırma davam etdirilir.
