Ruhlan Mustafazadə uşaqlığını qalayçı emalatxanasında keçirib. Atasının əllərinə baxa-baxa öyrənən gənc usta, artıq 10 ildir ki, bu işlə sərbəst məşğul olur. 29 yaşlı Ruhlan bu işlə məşğul olan ilk Mustafazadə deyil. Ulu babasından tutmuş atasına qədər, onun nəslində hər kəs məhz bu sənətlə dolanıb.
Ruhlan da inanır ki, sənət qanla keçən xüsusiyyətdir. O da, ata-babasının sənətini davam etdirməklə bu gözəl ənənəni qoruyub saxlamağa çalışır.
Bölgə müxbirimiz ustanın emalatxanasında gəzişərkən, Ruhlan Mustafazadə ona düzəltdiyi müxtəlif qabları göstərib, çoxdan unudulan və artıq gündəlik həyatımızda istifadə edilməyən qabların təyinatı haqda məlumat verib. Onun fikrincə, bu qabların çoxunun artıq istifadə edilməməsinin səbəbi insanların daha çox rahatlıq dalınca qaçmasıdır. Heç kəs teflon, şirə və alüminium qablarını qoyub, misdən istifadə etmək istəmir. Buna baxmayaraq, həmsöhbətimiz əmindir ki, mis qazanlarda bişirilən yeməklərin dadını heç nə əvəz edə bilməz.
