Rahim Zakiroğlu, Sputnik Azərbaycan
BAKI, 2 iyun — Sputnik. Yeddi yaşlı Miryaqub Samir oğlu Qasımov demək olar ki, danışa bilmir və dişləri də tamamilə çürüyüb. Raxitlik-D vitamini hipovitaminozundan əziyyət çəkən Miryaqub belini və başını dik saxlaya bilmir.
Anası Ruhiyyə Qasımova deyir ki, oğlu Miryaqubun bu xəstəliyini 7 yaşına qədər müalicə etmək olar, bundan sonra ötsə sağaltmaq mümkün olmayacaq: "Atam yox, qardaşım yox. Oğlanlarım mənə onların əvəzidir. Miryaqub bu il məktəbə getməlidir. Bizə uşağın Bakı şəhərində müalicəsi olduğunu dedilər. Bundan əvvəl 1 il ərzində 2 dəfə aparıb müalicə etdirdik, sonra isə imkanımız olmadığından müalicəni davam etdirə bilmədik. Uşağa pensiya da verilmir. İmkanım olsaydı özüm müalicə etdirərdim. Pensiya almaq nəyimə gərəkdir ki? Evim-eşiyim, heç nəyim yoxdur, kirayədə qalırıq. Anam işləmir, qaynanam da bacardığı qədər bizə maddi kömək edir. Kiçik oğlum Mirəlimuxtarın da 5 yaşı var. Amma o da danışa bilmir. Yəni tək-tük sözləri deyir. Böyük qardaşı danışa bilmir deyə bu da ona baxıb danışmır. Mən bütün xalqımdan, imkanlı şəxslərdən bizə yardım etməyi xahiş edirəm. Oğlumu müalicə etdirməyə bizə yardım etsinlər. Yeddi yaşını tamamlamaq üzrədir. Bir az da keçsə ömürlük bu xəstəliklə qalacaq".
Uşaqların atası Samir Qasımov isə deyir ki, oğlu Miryaqubun xəstəliyinin səbəbi ana bətnində mikroba yoluxmasıdır: "Həmin vaxt anasını bir dəfə aparıb müalicə etdirdik. İmkanımız olmadığından müalicəni davam etdirə bilmədik. Mikrob səbəbindən də uşaq 2 ay vaxtından əvvəl dünyaya gəldi. Doğulandan bir qədər sonra uşağın vəziyyəti pisləşdi və xəstəxanada müalicə olundu. Əvvəlcə sarılıq olduğunu, sonra isə raxit olduğunu dedilər. Masallı Mərkəzi Rayon Xəstəxanasında müalicə edə bilmədilər, Bakı şəhərində K.Fərəcova adına Elmi Tədqiqat Pediatriya İnstitutuna (OMD xəstəxanası) yönlədirmə yazdılar. Orada da təxminən 2 aya yaxın müddətində müalicə aldı, bir az özünə gəldi. Həmin xəstəxanada mikrobla əlaqədar anadangəlmə sümük boşluğu olduğunu və Raxit-D vitamini hipovitaminozu diaqnozunu qoydular. Xəstəliyin müalicəsi var. Biri Rusiyaya aparmağı, başqa biri İran islam Respublikasına aparmağımı tövsiyə edir. Oğlumun xəstəliyinin Bakıda da müalicəsi var, amma mənim qəti imkanım yoxdur”.
Samir Qasımov cəmi 170 manat maaş aldığını və onun da 100 manatını da kirayə pulu ödədiyini deyir. O, ailəsini də çox çətinliklə dolandırdığından şikayət edir: “Miryaqubu 1-2 dəfə Göytəpə şəhərində Saleh adlı həkimin yanına müayinəyə aparmışdıq. Saleh həkim də uşaq üçün resept yazıb, o reseptə uyğun dərmanları almağa isə maddi imkanım çatmadı".
S.Qasımov həmçinin böyük oğlunun özünü tam sərbəst idarə edə bilmədiyini də bildirdi.
"Boğazında şişləri var. Stəkandan su içə bilmir. Başını dik tutub sərbəst qalmaq istəyəndə nəfəsi çatmır, uşaq boğulur. Əksər hallarda da axşam saat 9-dan sonra bir də görürsən ki, durduğu yerdə yıxılır, sanki bədəni gücsüzləşir. Bir neçə gün öncə də oxşar hadisə oldu yıxıldı, başı kreslonun tin hissəsinə dəydi. Sərbəst, nəzarətsiz qoymaq olmur. Çünki tez-tez yıxılır. Nevrozluğu da var, çox əsəbidir. Bir də gördün qardaşını itələyib yıxır, vurur. Mən də istəyirəm ki, mənim də oğlum hamının övladı kimi məktəbə gedib təhsil alsın. Mən imkanlı şəxslərdən, xalqımızdan övladımı müalicə etdirmək üçün kömək istəyirəm..."
7 yaşlı Miryaquba kömək etmək istəyənlər 050-759-37-87 və ya 050-991-16-19 nömrələrinə zəng edə bilərlər.
Unutmayın: Siz bir körpəni sağlam həyata qaytara bilərsiniz!
