BAKI, 20 may - Sputnik. Ermənistanın baş naziri Nikol Paşinyan ölkədə inqilabın ikinci və əsas mərhələsinin anonsunu verib. Bu barədə o, öz "Facebook" səhifəsində yazıb.
“Sabah saat 12:00-da mən Ermənistanda inqilabın ikinci, ən əsas mərhələsini elan edəcəm. Ümumxalq dəstəyini gözləyirəm” - o bildirib.
Daha öncə Paşinyan sosial şəbəkə vasitəsilə həmvətənlərini ölkədəki bütün məhkəmələri blok etməyə çağırıb. Onun sözlərinə görə, "heç kəs məhkəmə binalarına daxil ola bilməməlidir". Bu bəyanat sabiq prezident Robert Koçaryanın mayın 18-də məhkəmə qərarı ilə azadlığa buraxılmasından dərhal sonra səsləndirilib.
Koçaryanın azadlığa buraxılmasını Dağlıq Qarabağdakı qondarma rejimin sabiq və hazırkı rəhbərləri Bako Saakyan və Arkadi Qukasyan dəstəkləyiblər.
