Kəmalə Əliyeva, Sputnik Azərbaycan
BAKI, 15 may — Sputnik. "Avroviziya-2019" beynəlxalq musiqi müsabiqəsində Azərbaycanı təmsil edən Çingiz Mustafayev Ukraynanın NVRMIND nəşrinin açıq fotosessiyasında iştirak edib.
Sputnik Azərbaycan-ın məlumatına görə, müğənni bu fotosessiya zamanı çəkilmiş bir neçə şəklini "Instagram" sosial şəbəkəsindəki hesabından paylaşıb. Fotoların müəllifi məşhur ukraynalı fotoqraf və sözügedən nəşrin təsisçisi Dmitri Komisarenkodur. Bu fotoları başqalarından fərqləndirən ağ-qara fotoqrafiya sənətini və insan bədəninin gözəlliyini təcəssüm etdirməsidir.
Посмотреть эту публикацию в Instagram
Onun göstərəcəyi nömrənin səhnə qrafiki üzərində Moskvanın kreativ GST komandası işləyib. Xüsusi vizual effektlərə isə "Avroviziya-2016"-nın qalibi Camalanın nömrəsinin xüsusi effektləri üzərində işləmiş Front Pictures Creative Studio komandası cavabdehdir.
Müğənni özü səhnə nömrəsindən məmnundur. O, bununla öz qəhrəmanına demək istəyir ki, ona həqiqəti qəbul eləmək və ürəyini işığa açmaqla həyatı zəhərləyən münasibətləri sona çatdırmaq lazımdır.
Müsabiqənin yarımfinalı 14-16 may, finalı isə 18 mayda Təl-Əvivdə Dare to (Arzularına sərbəstlik ver) devizi altında keçiriləcək.
Çingiz Mustafayev "Yeni ulduz" layihəsində (ATV) qalib gələndən sonra populyarlaşıb. O, həmçinin gənc ifaçıların beynəlxalq"Yeni Dalğa" müsabiqəsində, "O səs Türkiyə" və "Ukraynanın səsi" vokal layihələrində də iştirak edib. O, bir sıra musiqi nominasiyalarının laureatı, gənc nəslin ən çox tələb etdiyi ifaçılardan biridir.
