Qələbənin 74-cü ildönümündə Bakıda yüzlərlə adam bütün dünyada keçirilən “Ölməz Alay” aksiyasına qoşulub. Ötən illərdə olduğu kimi, insanlar əllərində Qələbəni əldə edən yaxınlarının portretlərini tutaraq, Bakının Nərimanov rayonundakı “Qardaş qəbiristanlığı”na üz tutdular. Aksiya iştirakçıları küçələrdən keçərək, faşizmlə mübarizə aparanların xatirəsini yad ediblər.
“Ölməz Alay” vətənpərvərlik aksiyası hər il Qələbə Günündə dünyanın bir çox ölkələrinin şəhərlərində keçirilir. Aksiyanın əsas məqsədi hər bir ailədə müharibə ilə bağlı xatirələrin qorunub saxlanmasıdır.
Xatırladaq ki, İkinci Dünya Müharibəsi zamanı Azərbaycandan cəbhəyə 600 min döyüşçü gedib, onlardan 40 mini könüllü olub. Azərbaycandan çağırılan 300 min əsgər döyüşlərdə həlak olub. Azərbaycan əsgərləri Brest qalası uğrunda ən iri döyüşlərdə, Leninqrad və Moskvanın müdafiəsində, Stalinqrad, Ukrayna uğrunda döyüşlərdə iştirak ediblər, Pribaltikanın və Şərqi Avropa ölkələrinin azad edilməsi uğrunda vuruşaraq, Berlinə kimi çatıblar.
Azərbaycan həm də cəbhəni yanacaqla təmin edərək qələbəyə əvəzsiz töhfə verib. Müharibə vaxtı tank və hərbi texnikanın 85-90 faizi Bakı nefti ilə işləyib. Cəbhəyə 75 milyon ton neft və 22 milyon ton benzin göndərilib.
