BAKI, 11 aprel - Sputnik. Milli Məclisin Gənclər və idman komitəsinin bu gün keçirilən iclasında Gənclər Fondunun 2018-ci il ərzindəki fəaliyyəti haqqında hesabatı dinlənilib. Sputnik Azərbaycan xəbər verir ki, iclası komitə sədri Ülvi Quliyev açaraq Azərbaycanda gənclər və idman siyasətinin prioritet istiqamətlərdən biri olduğunu və dövlət başçısı tərəfindən bu sahəyə xüsusi diqqət ayrıldığını bildirib.
Komitə sədri deyib ki, Azərbaycanın daxili siyasəti sırf vətəndaş amili ilə bağlıdır: "Xalqımızın rifah halının yüksəldilməsi, layiqli həyat səviyyəsi ilə təmin olunması istiqamətində çox böyük işlər görülür. Xarici siyasətimiz də daxili siyasətimizin davamı olaraq milli və dövlət maraqlarına bağlıdır".
Hesabatı Gənclər Fondunun İcraçı direktoru Fərid Cəfərov təqdim edib. O bildirib ki, 2018-ci il martın 7-də Prezident İlham Əliyev Azərbaycan Respublikasında gənclər siyasəti sahəsində idarəetmənin təkmilləşdirilməsi ilə bağlı tədbirlər haqqında fərman imzalayıb: "Fərmana əsasən, Azərbaycan Respublikasının Prezidenti yanında Gənclər Fondunun əsasında "Azərbaycan Respublikasının Gənclər Fondu" publik hüquqi şəxs yaradılıb və bu qurumun Nizamnaməsi təsdiq edilib. Fondda 9 nəfər üzvdən ibarət Müşahidə Şurası yaradılıb".
Onun sözlərinə görə, 2018-ci ildə Fondun fəaliyyəti genişləndirilib: "Fondun fəaliyyətinin əsas məqsədi gənclər siyasəti ilə bağlı elm, təhsil, mədəniyyət və digər sosial sahələrə yönəlmiş ictimai və sosial əhəmiyyətli, o cümlədən beynəlxalq səviyyədə həyata keçirilən layihə və proqramları qrant şəklində məqsədli maliyyələşdirməkdən, həmin sahədə konfrans, seminar, festival, olimpiada və digər tədbirlərin təşkilindən, habelə gənclərə maliyyə köməyi nəzərdə tutan layihələri dəstəkləməkdən ibarətdir".
Millət vəkili bildirib ki, son bir ildə Müşahidə Şurasının 5 iclası keçirilib: "Fond olaraq daim gənclər təşkilatları ilə görüşürük. Daim regionlara müxtəlif səfərlər edirik və gənclərlə görüşürük".
F.Cəfərov deyib ki, istedadlı və sosial həssas kateqoriyadan olan gənclərin təhsil haqqı borclarının ödənilməsi əsas istiqamətlərdən olub: "2018-ci ildə Fond gənclərin təhsil haqqının ödənilməsi ilə bağlı müsabiqə keçirib. Qiymətləndirmə əsasında 237 gəncin təhsil haqqı borcları Gənclər Fondu tərəfindən ödənilib. Gənclər bunu rəğbətlə qarşılayıb".
Onun sözlərinə görə, Gənclər Fondu 2018-ci ildə bir qrant müsabiqəsi keçirib və nəticədə gənclərin 270, gənclər təşkilatlarının isə 91 layihəsi maliyyələşdirilib: "Bu ilin iyun-avqust ayları ərzində yenidən müsabiqə elan ediləcək və bu il daha çox gəncin təhsil haqqı borcunun ödənilməsi nəzərdə tutulur".
