BAKI, 9 fevral — Sputnik. Yəməndə 12 yaşlı bir uşağa cinsi təcavüz edən və daha sonra onu öldürən iki şəxs edam olunub.
Sputnik Azərbaycan-ın Türkiyə mediasına istinadən xəbərinə görə, 28 yaşlı Refat və 31 yaşlı Halit öncə edam meydançasına gətirilib. Daha sonra həmin şəxslərə içmək üçün su verilib. Yalnız bundan sonra onların edamı ölkələrarası beynəlxalq agentlərin gözü qarşısında reallaşdırılıb.
12 yaşlı uşağı qətlə yetirən şəxslər yerə uzadılaraq avtomatdan açılan atəşlə öldürülüb. İnsanlar edama yaxın məsafədən baxmaq üçün bir-biri ilə mübarizə aparıblar.
Qeyd edək ki, cinayəti törədənlər azyaşlının göz yaşlarına dayana bilmədiklərini və bu səbəbdən onun boğazını kəsərək öldürdüklərini söyləyiblər.
Xatırladaq ki, daxili müharibənin davam etdiyi Yəmən insan haqlarının pozulmasına görə bir sıra beynəlxalq siyahılarda ən üst pillələrdədir.
