BAKI, 3 fevral - Sputnik. Qarlı və şaxtalı havada köməksiz vəziyyətdə qalmış dörd nəfər xilas edilib.
Sputnik Azərbaycan-ın xəbərinə görə, bu haqda Fövqəladə Hallar Nazirliyindən məlumat veriblər.
“112” qaynar telefon xəttinə daxil olmuş məlumata əsasən, qarlı və şaxtalı hava şəraitində yolların buz bağlaması səbəbindən “Nissan” markalı minik avtomobilində olan 4 nəfər Qobustan rayonunun Qaracüzlü kəndi ərazisində köməksiz vəziyyətdə qalıb.
Aidiyyəti dövlət qurumları məlumatlandırılıb, Dövlət Yanğından Mühafizə Xidmətinin müvafiq xilasetmə qüvvələrinin əraziyə cəlb olunması üçün qərar qəbul olunub.
Xilasetmə tədbirləri nəticəsində vətəndaşlar xilasetmə avtomobili ilə təhlükəsiz əraziyə çıxarılıblar. Əməliyyat uğurla başa çatıb.
