BAKI, 17 yanvar - Sputnik. "Azərbaycana xaricdən gətirilən kitablar Əlavə Dəyər Vergisindən azad edilməlidir".
Sputnik Azərbaycan xəbər verir ki, bu təkliflə millət vəkili Əflatun Amaşov Milli Məclisin Mədəniyyət komitəsinin bu gün keçirilən iclasında çıxış edib. O, xaricdən gətirilən elmi jurnalların da Əlavə Dəyər Vergisindən (ƏDV) azad edilməsini təklif edib: "Kitabların qiyməti çox bahadır. Bu kitablar, əsasən xaricdən Azərbaycana gətirilənlərdir. İl ərzində ölkəyə 200 minə yaxın kitab gətirilir".
Mədəniyyə komitəsinin sədri Rafael Hüseynov da bu sahədə müəyyən güzəştlərə, imtiyazlara ehtiyacın olduğunu deyib: "Amma xaricdən gətirilən kitabların bahalaşmasının obyektiv səbəbləri var. Xarici ölkələrdə satılan kitabların qiyməti artıb. Kitab baha başa gəlir və ona görə qiyməti artıb".
"Amma burada müəyyən güzəştlər, imtiyazlar lazımdır. Xaricdən gətirilən dərs vəsaitlərinə, müəyyən xəritələrə güzəştlər, imtiyazlar olmalıdır ki, insanlar bunları ala bilsinlər" - deyə R.Hüseynov bildirib.
