Rahim Zakiroğlu, Sputnik Azərbaycan
BAKI, 8 yanvar — Sputnik. Astara Rayon Polis Şöbəsinin əməkdaşlarının keçirdikləri əməliyyat-axtarış tədbirləri nəticəsində külli miqdarda narkotik vasitə aşkarlanaraq qanunsuz dövriyyədən çıxarılıb.
Sputnik Azərbaycan-ın bölgə müxbirinin DİN Mətbuat Xidmətinin Lənkəran Regional Qrupundan əldə etdiyi məlumata görə, Astara RPŞ-nin əməkdaşlarının Astara rayonunun Sərək kəndi ərazisində keçirdikləri əməliyyat tədbirləri nəticəsində kənd sakini Rüfət İsmayılovun yaşadığı evdən ayrı-ayrı bükümlərdə çəkisi 6 kiloqram 210 qram narkotik vasitə olan həşiş qətranı, 56 qram marixuana, 10 qram psixatrop maddə olan metamfetamin aşkar edilərək götürülüb.
Araşdırmalar zamanı o da müəyyən edilib ki, R.İsmayılov narkotik vasitələri İran İslam Respublikasının vətəndaşı olan Cavanşir adlı şəxsdən əldə edib. Məlumat üçün bildirək ki, saxlanılan Rüfət İsmayılov əvvəllər də narkotik vasitələrin qanunsuz dövriyyəsinə görə məhkumluq həyatı yaşayıb.
Faktla bağlı araşdırma aparılır.
