BAKI, 23 noyabr — Sputnik. Bu gün Fransanın paytaxtı Paris şəhərində Beynəlxalq Sərgi Bürosunun Baş Assambleyasının 164-cü sessiyasında keçiriləcək səsvermə zamanı EKSPO-2025 Ümumdünya Sərgisinin təşkil olunacağı şəhər seçiləcək.
Sputnik Azərbaycan xəbər verir ki, EKSPO-2025-in keçirilmə hüququ uğrunda Bakı, Yekaterinburq (Rusiya) və Osaka (Yaponiya) şəhərləri mübarizə aparacaq.
Bakı və Yekaterinburqdan fərqli olaraq, Osaka 1970-ci ildə bir dəfə bu sərgini qəbul edib.
Qeyd edək ki, EKSPO 170-dən çox ölkənin iştirakı ilə keçirilən ən böyük beynəlxalq sərgidir. Bu ölkələr hər beş ildən bir elm, texnika, memarlıq və incəsənət sahəsində əldə etdikləri ən yaxşı nailiyyətlərini nümayiş etdirir.
