Bu gün “Qadın Liderliyi Uğrunda” İctimai Birliyinin təşkilatçılığı ilə Sputnik Azərbaycan Multimedia Mətbuat Mərkəzində keçirilən tədbirdə Azərbaycan ailələrində qız uşaqlarının sayının azalması ilə bağlı problem müzakirə edilib.
“Qadın Liderliyi Uğrunda” İctimai Birliyinin sədri Ülkər Abdullayeva deyib ki, hazırda Azərbaycan ailələrində qız uşaqlarının ixtisarı başlıca problemlərdən biridir:
“Ailələrdə olan bəzi problemlər bizim üçün utanc gətirir. Onlardan biri də qız uşaqlarına qarşı olan münasibətdir. Cəmiyyətdə zorakılıq hallarından danışarkən daha çox ailədə qadına qarşı olan şiddətdən danışırıq. Bu gün də ailələrdə qadına qarşı zorakılıq, şiddət davam edir. Bütün bunların fonunda da qız uşaqları arzuolunmaz övlada çevrilirlər. Ailələr qız uşaqlarının olacağını biləndə onu dərhal abort etdirməyə can atırlar. Qız uşaqlarının abort etdirilməsi demoqrafik problemə gətirib çıxarır. Ailələr qızlarını ağır yük kimi qəbul edirlər və onları erkən yaşda ərə verirlər ki, bu yükdən azad olsunlar”.
Ülkər Abdullayevanın fikirlərinə audiofaylda qulaq asa bilərsiniz:
