BAKI, 13 noyabr — Sputnik. “Şimal Elektrik Stansiyasının ehtiyat blokunun transformatorunda yanğın baş verib və yanğın tez bir zamanda lokallaşdırılıb”.
Sputnik Azərbaycan xəbər verir ki, bu barədə “Report”a qurumun ictimaiyyətlə əlaqələr və mətbuat xidmətinin rəisi Yəhya Babanlı deyib.
Y.Babanlının sözlərinə görə, qəza elektrik enerjisi istehsalı prosesinə təsir etməyib: “Baş verən hadisə nə Şimal Elektrik Stansiyasının işinə, nə də ümumi enerji sisteminin fəaliyyətinə heç bir təsir göstərməyib”.
Xatırladaq ki, bu gün saat 16:00 radələrində Bakı şəhəri Xəzər rayonu ərazisində yerləşən Şimal İstilik Elektrik Stansiyasında güclü yanğın olub.
Hadisə ilə bağlı 2-ci dərəcəli yanğın çağırışı ilə əraziyə bir neçə yanğınsöndürmə briqadası cəlb edilib.
Xəzər rayon Yanğından Mühafizə Hissəsindən bildirilib ki, artıq yanğın söndürülüb.
Hadisəyə səbəb transformatorlardan birində qəzanın baş verməsi olub.
