Bu gün Bakıda iş və marketinq dünyasının qabaqcıl trendi "İnfluencer Marketing" strategiyalarının qiymətləndirilməsi məqsədilə həyata keçirilən "Global İnfluencer Day" konfransı start götürüb. Keepface İnfluencer Marketinq Platformasının rəsmi dəstəyi ilə FA İnternational Trade Events şirkəti tərəfindən təşkil olunan konfransın əsas qonağı robot-ginoid Sofiya olub. O, konfrans iştirakçılarını salamlayıb və hətta onlarla zarafat da edib.
Bakıdakı Heydər Əliyev Mərkəzində keçirilən "Global Influencer Day" hər kəsin - sosial media və rəqəmsal marketinq sahəsində çalışanların, SMM menecerlərinin, bloqqerlərin, marketinq mütəxəssislərinin və digərlərinin diqqətini cəlb edib.
Ölkəmizə gəlişi ilə Azərbaycanın internet seqmentində məşhurlaşan robot Sofiya öz çıxışında qeyd edib ki, rəqəmsal texnologiyaların insanların rifahına xidmət etməsində maraqlıdır. O, zarafatla Azərbaycan mətbəxinin dadlı olduğunu eşitdiyini, lakin təəssüf ki, ondan dadmaq imkanının olmadığını deyib.
"Global Influencer Day" konfransı Nəqliyyat, Rabitə və informasiya Texnologiyaları Nazirliyi, Heydər Əliyev Mərkəzi, Azərbaycan Dövlət Turizm Agentliyi, ADA Universiteti, Amerika Ticarət Palatası, Azərbaycan Konqreslər Bürosu və SAMSA Network tərəfindən dəstəklənib.
"Global İnfluencer Day" tədbirində "influencer"lər, brend sahibləri, investorlar, marketinq və PR mütəxəssisləri, media nümayəndələri və iş dünyasından nümayəndələr qatılıb.
Sputnik Azərbaycan sözügedən tədbirdən çəkilmiş maraqlı fotoları oxuculara təqdim edir.
