Rahim Zakiroğlu, Sputnik Azərbaycan
BAKI, 23 oktyabr — Sputnik. Astarada həmyerlisini döyərək zorla əlindən pulunu alan şəxs saxlanılıb.
Astara şəhər sakini Rafiq Ağayev DİN-in 102- Xidməti zəng mərkəzinə müraciət edib. Sputnik Azərbaycan-ın bölgə müxbirinin DİN-in Mətbuat Xidmətinin Lənkəran Regional Qrupundan əldə etdiyi məlumata əsasən, müraciət edən R.Ağayev Astara rayonunun Şahağacı kəndi ərazisində naməlum şəxsin onu döyərək üzərindəki pulu zorla ələ keçirərək qaçdığını bildirib.
Astara Rayon Polis Şöbəsinin əməkdaşlarının keçirdikləri əməliyyat-axtarış tədbirləri nəticəsində soyğunçuluq törətməkdə sübhəli bilinən rayonun Şahağacı kənd sakini Bəxtiyar Mirzəyev saxlanılıb. Saxlanılan B.Mirzəyev törətdiyi əməli etiraf edib. Onun üzərinə baxış keçirilərkən zərəçəkmiş şəxsdən mənimsədiyi 55 manat pul aşkarlanaraq maddi sübut kimi götürülüb.
Faktla bağlı Astara Rayon Polis Şöbəsinin İstintaq bölməsində cinayət işi başlanılıb, araşdırmalar davam etdirilir. Məlumat üçün bildirək ki, saxlanılan Bəxtiyar Mirzəyev əvvəllər oğurluq etdiyi üçün məhkumluq həyatı yaşayıb.
