BAKI, 12 oktyabr — Sputnik. "Azərbaycanda bir qrup insan bir mənzili bir neçə nəfərə satır, vətəndaşların vəsaitləri mənimsənilir".
Sputnik Azərbaycan xəbər verir ki, bunu Milli Məclisin bu gün keçirilən plenar iclasında millət vəkili Siyavuş Novruzov deyib.
S.Novruzov bildirib ki, vətəndaşlara hüquqi əsası olmayan müqavilə verilir: "İnsanlar belə hallarla bağlı hüquq-mühafizə orqanlarına müraciət edirlər, onlar məsuliyyətə cəlb edilirlər. Bəzi hallarda məlum olur ki, həmin şirkətlər məsuliyyətə cəlb edilənin adına deyil. Soruşanda da məlum olur ki, bunun heç prosesdən xəbəri yoxdur. İnsanları aldadanlar məcburi köçkünlərin adından da sui-istifadə edirlər ki, güzəştlər əldə etsinlər".
O, bildirib ki, insanları aldadan, vəsaitini mənimsəyən bir kənarda qalır, günahsız bir insanı həbsə salırlar. Belə halların qarşısını almaq üçün bina inşası üçün müraciət edən insanlar yoxlanılmalıdır: "Araşdırılmalıdır ki, bu insanın daxma tikməyə imkanı var, yoxsa yox? Düzdür, buna qadağa qoymaq olmaz, amma hansısa formada nəzarət olmalıdır. Qanunvericilikdə edilən dəyişikliyə görə, həbs edilən şəxs dəymiş ziyanı ödəyirsə, azadlığa buraxılır. Amma başa düşmək lazımdır ki, onlar insanların 20-30 ilini oğurlayırlar. Bunu hansısa məbləğlə hesablamaq düzgün deyil".
