Şahpəri Abbasova, Sputnik Azərbaycan
BAKI, 3 oktyabr — Sputnik. Dam örtükləri ilə yüklənmiş yük avtomobili aşıb. Sputnik Azərbaycan-ın bölgə müxbiri xəbər verir ki, hadisə ötən gecə Yevlax-Zaqatala-Gürcüstan sərhəd magistral yolunun 87-ci kilometrliyində, Qax rayonu ərazisində baş verib.
Belə ki, Zaqatala rayon sakini, 1984-ci il təvəllüdlü Bəxtiyar Balayev idarə etdiyi "Mersedes" markalı yük maşını ilə Zaqatala rayonu istiqamətində hərəkətdə olarkən idarəetməni itirib. Nəticədə şiferlə dolu yük maşını yolun kənarındakı çökəkliyə aşıb.
Qəza zamanı sürücü yüngül xəsarət alsa da, sərnişin, Zaqatala şəhər sakini, 1979-cu il təvəllüdlü Rəşadət Məmmədov aldığı xəsarətlərlə Zaqatala Rayon Mərkəzi Xəstəxanasına (MRX) yerləşdirilib. Xəsarət alan şəxs hazırda travmatologiya şöbəsində müalicə olunur. Vəziyyəti orta-ağır kimi qiymətləndirilir.
Baş vermiş qəza ilə bağlı araşdırma aparılır.
