İradə Cəlil, Sputnik Azərbaycan
BAKI, 4 iyul — Sputnik. Bir müddət əvvəl sosial şəbəkələrdə Xırdalan qəbiristanlığındakı, Qarabağ müharibəsində şəhid olmuş Əfqanıstan vətəndaşlarının məzarlarının acınacaqlı durumunu əks etdirən video yayılmışdı. Videoda məzarların baxımsız qalmasından, dağılmasından söhbət gedirdi.
Sputnik Azərbaycan məsələni araşdırıb. Məlum olub ki, Xırdalan məzarlığının ən hündür yerində, əfqanlar üçün ayrılmış xüsusi yerdə 25 məzar var. Onlardan 7-si 90-cı illərdə Qarabağ müharibəsində həlak olmuş şəxslərin məzarıdır. Həmin məzarlar ilk dəfə Əfqan Veteranları İctimai Birliyi (ƏVİB) tərəfindən qoyulub.
Xırdalan qəbiristanlığının direktor İsamil İsayev Sputnik Azərbaycan-a açıqlamasında bildirib ki, qəbiristanlıqdakı 7 şəhid məzarından 3-nün başdaşını külək sındırıb: "Sonradan dördünü də biz çıxarıb qoyduq ki, onları da külək uçurmasın. Ola bilsin ki, qəbirlər düzəldilən zaman hansısa fəhlə tikinti materiallarından kəsib. Ona görə də məzarlar indiki vəziyyətə düşüb".
İ.İsayevin sözlərinə görə, məzarlar 3-4 ildir ki, bu vəziyyətdədir. Amma son günlər məlumatların yayılması aidiyyatı qurumların diqqətinə səbəb olub: "İdarəmiz tərəfindən də əraziyə baxış keçirilib. Yaxın günlərdə bütün məzarlar təmir ediləcək".
Müsahibimiz onu da qeyd edib ki, ərazi 90-cı illərin əvvəllərində əfqanların dəfn edilməsi üçün ayrılıb: "Orada 7 Qarabağ müharibəsi şəhidi ilə yanaşı 18 digər əfqan məzarları da var. Bu da həmin şəhidlərin qohum əqrəbalarının məzarlarıdır. Ola bilsin ki, o vaxt gəliblər, burada ailə həyatı qurublar, burada yaşayıblar, geri qayıtmayıblar. Dünyalarını dəyişdikdən sonra da bu ərazidə öz qohumlarını yaxınlığında dəfn ediliblər".
