BAKI, 2 iyul — Sputnik. Astara Rayon Polis Şöbəsinin əməkdaşları narkotik vasitələrin qanunsuz dövriyyəsi və kultivasiya yolu ilə narkotik tərkibli bitkilərin yetişdirilməsi ilə məşğul olan şəxslərin aşkar edilərək saxlanılması məqsədilə uğurlu əməliyyatlar həyata keçirib.
Sputnik Azərbaycan-ın Cənub bürosunun verdiyi xəbərə əsasən, Astara RPŞ-nin əməkdaşları tərəfindən rayonun Şahağacı kəndi ərazisində narkotik tərkibli çətənə kolları əkib becərən şəxs saxlanılıb. Şahağacı kənd sakini Xosrov Rüstəmovun icarəyə götürdüyü torpaq sahəsinə baxış keçirilən zaman qulluq göstərərək becərdiyi 40-180 santimetr hündürlükdə, 52 ədəd təmiz çəkiləri 10 kiloqram 250 qram olan və becərilməsi qanunla qadağan edilmiş, tərkibində narkotik maddələr olan çətənə bitkiləri aşkar edilərək götürülüb.
Elə həmin gün Astara polisinin keçirdiyi digər əməliyyat tədbiri nəticəsində narkotik vasitələrin satışı ilə məşğul olan Astara sakini saxlanlıb. Belə ki, Astara şəhər sakini Fariz Məmmədov 5 büküm narkotik vasitə olan heroini şərti alıcıya satarkən saxlanılıb. F.Məmmədovun yaşadığı evə baxış keçirilərlən orada da narkotik vasitə aşkarlanıb. Ümumilikdə 7 büküm heroin aşkar edilərək götürülüb.
Faktla bağlı Astara Rayon Polis Şöbəsinin İstintaq Bölməsində cinayət işi başlanılıb. Araşdırmalar davam etdirilir.
