BAKI, 29 iyun — Sputnik. Zaqatala Rayon Polis Şöbəsinin əməkdaşları rayonda narkotik vasitələrin qanunsuz dövriyyəsi ilə məşğul olan şəxslərin aşkarlanaraq istintaqa təhvil verilməsi istiqamətində növbəti əməliyyat-axtarış tədbiri keçiriblər.
Sputnik Azərbaycan-ın bölgə müxbiri xəbər verir ki, axtarış zamanı rayonun Mosul kəndində qeydiyyatda olan, hazırda Zaqatala şəhəri ərazisində istifadə edilməyən hamamın inzibati binasından sığınacaq kimi istifadə edən, 1965-ci il təvəllüdlü Kamil Durmuşov şübhəli şəxs qismində saxlanılıb.
Tutulan şəxsin üzərindən 14,14 qram narkotik vasitə hesab edilən qurudulmuş marixuana aşkar edilərək götürülüb. Səfil həyat sürən rayon sakininin sığınacaq kimi istifadə etdiyi hamam binasında aparılan əməliyyat zamanı onun yatdığı çarpayının altından isə 480 qram qurudulmuş marixuana aşkarlanaraq götürülüb.
Faktla bağlı Zaqatala RPŞ-də araşdırmalar davam edir.
