Rizvan Hüseynov: “Azərbaycanda ordu quruculuğu üçün tarixi ənənə var idi”
“Azərbaycan ordusundan danışarkən onun yaranma dövrünə nəzər yetirməliyik”. Sputnik Azərbaycan-ın məlumatına görə, bunu Sputnik Azərbaycan Multimediya Mərkəzində Azərbaycan Ordusunun 100 illiynə həsr olunmuş tədbirdə Qafqaz Tarixi Mərkəzinin direktoru Rizvan Hüseynov deyib.
Tarixçi bildirib ki, SSRİ-nin dağılmağa başladığı bir dövrdə müstəqil Azərbaycan ordusu yaranmağa başladı: “Ordu quruculuğu mürəkkəb və vacib məsələdir. Onu yaratmaq üçün illərin təcrübəsi və ənənə lazımdır. Bizdə bu ənənə var idi, sadəcə Sovet dövründə qırılmışdı. Ordumuz son 25 il ərzində mürəkkəb yol keçib. Bu gün ordumuzda əsas dayağımız gənc əsgərlərdir. Onlar mənəvi-psixoloji baxımdan müasir ordu üçün tam yararlıdırlar”.
1918-ci il iyunun 26-da Azərbaycan Demokratik Respublikası Nazirlər Şurasının qərarı ilə ilk müntəzəm hərbi hissə – Əlahiddə Azərbaycan Korpusu yaradılıb. Bu qərar Şərqin müsəlman aləmində ilk demokratik hökumətin öz ordusunu yaratmasına hüquqi əsas verib.
