Sahib Məmmədov: ““İşsizlikdən sığorta haqqında” qanunda konstitusiyaya zidd müddəalar var.”
“Əmək bazarında şəffaflığın təmin edilməsi üçün ciddi islahatlar aparılmalıdır”. Bunu Əmək və əhalinin sosial müdafiəsi naziri Sahil Babayev Nazirlik yanında Dövlət Əmək Müfəttişliyi Xidmətinin fəaliyyətinin, əmək qanunvericiliyinə əməl olunmasına dövlət nəzarəti sisteminin təkmilləşdirilməsi məsələlərinin müzakirəsi, bu sahədə qarşıda duran vəzifələrin müəyyən olunması məqsədilə keçirilən müşavirədə deyib.
Vətəndaşların Əmək Hüquqlarını Müdafiə Liqasının sədri Sahib Məmmədov Sputnik Azərbaycan-a bildirib ki, Azərbaycanda hazırkı Əmək Məcəlləsi əmək münasibətlərini tənzimləmək üçün yetərli deyil.
“Əmək Məcəlləsi yenidən yazılmalıdır. Hazırkı Əmək Məcəlləsində olan boşluqlar qeyri-formal əmək bazarının inkişafına şərait yaradır. Həmçinin “Məşğulluq haqqında” qəbul olunmuş qanun müasir dövrün tələblərinə cavab vermir. Ondan əvvəl də “İşsizlikdən sığorta haqqında” qanun qəbul olundu. Həmin qanunda da konstitusiyaya zidd müddəalar var. Əmək bazarında şəffaflığı təmin etmək üçün hazırlanmış qanun layihələri ictimaiyyətə açıqlanmalıdır”, — deyə ekspert vurğulayıb.
Sahib Məmmədovun geniş şərhinə audiofaylda qulaq asa bilərsiniz
