BAKI, 5 iyun — Sputnik. ATƏT-in Minsk qrupunun həmsədrləri Endryu Şofer (ABŞ), Stefan Viskonti (Fransa) və İqor Popov iyunun 13-ü Ermənistana səfər edəcək. Sputnik Ermənistan xəbər verir ki, bunu Ermənistan xarici işlər naziri Tiqran Balayan bildirib.
Səfər zamanı həmsədrlər ilk dəfə Ermənistanın yeni hökumətinin üzvləri ilə görüşəcəklər.
"Təbii ki, bir sıra görüşlər keçiriləcək, onların nəticələri barədə məlumat verəcəyik", — deyə Ermənistan XİN rəsmisi qeyd edib.
Balayan, eyni zamanda vurğulayıb ki, görüşlərin proqramı hələlik dəqiqləşdirilməyib.
Xatırladaq ki, Ermənistanın sabiq baş naziri Serj Sarqsyan aprelin 23-də uzun müddət davam edən etiraz aksiyalarından sonra istefa verməyə məcbur olub. Mayın 8-ində isə Ermənistan Milli Məclisi xüsusi iclasında ölkənin baş nazirini seçib. Baş nazir postunu "Mənim addımım" hərəkatının lideri Nikol Paşinyan tutub. Onu deputatların 59-u dəstəkləyib. 42 deputat isə Paşinyanın əleyhinə səs verib.
