BAKI, 23 may — Sputnik. "Biz hər hansı bir xalqın ailə modelini götürüb tətbiq edə bilmərik. Biz öz ailə modelimizi inkişaf etdirməliyik".
Sputnik Azərbaycan xəbər verir ki, bunu bu gün Milli Məclisdə "Azərbaycan ailə modeli: Müasirlik və dəyərlər" mövzusunda keçirilən tədbirdə parlamentin İctimai birliklər və dini qurumlar komitəsinin sədri, Yeni Azərbaycan Partiyası icra katibinin müavini Siyavuş Novruzov deyib.
O bildirib ki, ailə məsələsi Azərbaycanda çox ciddi bir məsələdir: "Ailə kiçik dövlətdir. Zaman dəyişdikcə ailə münasibətlərinə də biz fərqli yanaşmlıyıq. Biz hər hansı bir xalqın ailə modelini götürüb tətbiq edə bilmərik. Biz öz ailə modelimizi inkişaf etdirməliyik. Keçmişdə internet yox idi, indi var, "Facebook" yox idi, indi var".
Millət vəkilinin sözlərinə görə, ailələrin dağılması çox ciddi problemə çevrilib: "Əsasən ilk 6 ay — 1 il ərzində ailə dağılır, bu baryeri aşa bilməyən ailələr dağılır. Ən ciddi problem valideynlərin ailəyə müdaxiləsidir. Bu, ailələrin dağılmasının əsas səbəblərdən biridir. Sosial şəbəkələrin ailələrin dağılmasında böyük "xidmətləri" var".
