BAKI, 17 may — Sputnik. Ermənistan baş naziri Nikol Paşinyan hesab edir ki, bütün məmurların "dərhal" istefa verməsini tələb etmək düzgün deyil. Sputnik Azərbaycan RİA Novosti-yə istinadən xəbər verir ki, baş nazir bu məsələyə mərhələli şəkildə yanaşmalı olduqlarını bildirib.
"Hamının dərhal istefaya göndərilməsini tələb etmək düzgün deyil. Hesab edirəm ki, bu məsələyə mərhələli şəkildə yanaşmaq lazımdır", — deyə Paşinyan Yerevan meri və ölkənin Baş Prokurorunun istefaya göndərilməsi tələblərinə münasibət bildirərkən qeyd edib.
2016-ci ildə post-patrul xidmətinin binasını ələ keçirən silahlı qruplaşmanın tərəfdarlarının aksiyasından danışan Paşinyan bildirib ki, bu aksiyaların kimə qarşı yönəldiyini anlamaq lazımdır: "Mən açıq şəkildə məsələ ilə bağlı ictimai həmrəyliyin vacibliyini vurğulamışam. Düşünürəm ki, mənim istənilən həbsxanaya daxil olaraq qapıları aça bilməyimlə bağlı yanaşma yanlışdır. Prosedurlar mövcuddur".
