BAKI, 19 aprel — Sputnik. AZAL yay uçuş cədvəli çərçivəsində üç yeni istiqamət açır. Bu barədə Sputnik Azərbaycan-a "Azərbaycan Hava Yolları" QSC-nin mətbuat xidmətindən məlumat verilib. Bildirilib ki, "Azərbaycan Hava Yolları"nın yay uçuş cədvəli çərçivəsində üç yeni istiqamətə — Səudiyyə Ərəbistanının Dammam və Ər-Riyad şəhərləri (iyunun 15-dən sentyabrın 1-dək), eləcə də Monteneqronun populyar kurortu olan Tivata (iyulun 5-dən sentyabrın 15-dək) Bakıdan birbaşa reyslər yerinə yetirəcək.
Reyslər komfortlu "Airbus A320" laynerləri ilə yerinə yetiriləcək.
Aviabiletin qiymətinə baqajın pulsuz daşınması (23 kq-a kimi), soyuq və isti yeməklərin tam çeşidi daxildir.
Aviabiletləri AZAL-ın kassalarında və aviaşirkətin rəsmi agentliklərində https://www.azal.az/az/information/sales-offices bronlaşdırmaq və əldə etmək mümkündür. Yaxın zamanda yeni istiqamətlərə aviabiletləri www.azal.az saytında da əldə etmək mümkün olacaq.
