BAKI, 14 aprel — Sputnik. ABŞ prezidenti Donald Tramp səhərə yaxın Amerika ordusuna Suriyadakı kimyəvi silah obyektlərini vurması üçün əmr verdiyini açıqlayıb.
Sputnik Azərbaycan “BBC”yə istinadla xəbər verir ki, bu açıqlamanın ardından ABŞ Müdafiə Nazirliyi (Pentaqon) Suriyada bir çox hədəfin vurulduğunu bildirib. Açıqlamaların ardından Rusiya isə təcavüzün nəticəsiz qalmayacağını bildirib.
Donald Tramp Ağ Evdə verdiyi açıqlamda hücuma Böyük Britaniya və Fransanın da dəstək verdiyini bildirib. ABŞ prezidenti hücumun məqsədini kimyəvi silahların istehsalı, yayılması və istifadəsinin qarşısını almaqdır deyib.
“Reuters” xəbər agentliyinə danışan bir amerikalı səlahiyyətli Suriyadakı bir çox yerin “Tomahavk” raketləri ilə vurulduğunu deyib.
Böyük Britaniyanın baş naziri Tereza Mey də, Britaniyanın əməliyyata dəstək verdiyini, güc tətbiqindən başqa bir alternativin olmadığını qeyd edib. May, əməliyyatın Suriyada bir rejim dəyişikliyi ilə əlaqəsinin olmadığını deyib.
ABŞ müdafiə naziri Ceyms Mattis ilk hücum dalğasının sona çatdığını vurğulayıb.
