Rahim Zakiroğlu, Sputnik Azərbaycan
BAKI, 13 aprel — Sputnik. Yardımlı rayonunda qohumlar arasında kütləvi dava baş verib. Sputnik Azərbaycan-ın bölgə müxbiri xəbər verir ki, hadisə rayonun Bürzünbül kəndində yaşanıb.
Qohum ailələr olan Rəciyevlər və Haxıəliyevlər arasında mübahisə yaranıb. Torpaq ərazisinin müəyyən edilməsi səbəbindən yaranan mübahisə daha sonra davaya çevrilib. İlkin məlumata əsasən, dava zamanı 53 yaşlı Bürzümbül kənd sakini Bəyzadə Rəciyev müxtəlif dərəcəli bədən xəsarətləri aldığından dünyasını dəyişib.
Davada iştirak edən digər şəxslər — 55 yaşlı Nuru Haxıəliyev, 25 yaşlı Şirxan Haxıəliyev, 25 yaşlı Elvin Rəcil və 19 yaşlı Əvəz Rəcili müxtəlif dərəcəli bədən xəsarətləri ilə Yardımlı Rayon Mərkəzi Xəstəxanasına çatdırılıblar. Bəyzadə Rəciyevin ölümündə şübhəli bilinən Şirxan Haxıəliyev polis tərəfindən saxlanılıb.
Digər yaralıların müalicəsi davam etdirilir. Baş vermiş hadisə ilə bağlı Yardımlı Rayon Prokurorluğunda Cinayət Məcəlləsinin 120.1-ci (Qəsdən adam öldürmə" maddəsi ilə cinayət işi açılıb, müvafiq ekspertizalar təyin edilib. Hazırda istintaq davam etdirilir.
