Heydər Əliyev Mərkəzinin qarşısındakı parkda İlham Əliyevin 11 apreldə Azərbaycanda keçirilən prezident seçkilərində qalib gəlməsi münasibətilə qələbə konserti keçirilib. Sputnik Azərbaycan xəbər verir ki, dövlət başçısı konsertə toplaşan vətəndaşlar qarşısında çıxış edib və seçkidə onu dəstəklədiyinə görə seçicilərinə minnətdarlığını bildirib.
İlham Əliyevin sözlərinə görə, Azərbaycan xalqından gələn bu dəstək onu daha da ruhlandırıb və ona güc verib. Prezident qeyd edib ki, bu prezident seçkiləri Azərbaycanda bütün azadlıqların təmin edildiyini bir daha nümayiş etdirib. Gənclərə müraciət edən İlham Əliyev deyib ki, Azərbaycanın gələcəyi onların əlindədir.
Dövlət başçısı, onun xanımı Mehriban Əliyeva və digər ailə üzvləri konsert zamanı öz seçiciləri, artistlər, mədəniyyət və incəsənət xadimləri ilə xatirə şəkilləri çəkdiriblər. Konsert möhtəşəm atəşfəşanlıqla başa çatıb.
