BAKI, 30 mart — Sputnik. Ohayo ştatında təşkil edilən bir mitinqe qatılan ABŞ prezidenti Donald Tramp Suriya mövzusunda önəmli mesajlar verib.
Sputnik Azərbaycan xəbər verir ki, iqtisadiyyatla bağlı çıxışının bir yerində sözü ABŞ-ın Suriyadakı xərclərinə gətirən Tramp, "Suriyadan çox yaxında çıxacağıq. Çox yaxında. Qoy artıq bölgədəki digər insanlar onunla məşğul olsunlar. "Xilafət" adlandırdıqlarının tamamilə axırına çıxacağıq. Hər yeri İŞİD-in əlindən geri alacağıq" bəyanatını verib.
ABŞ ordusunun İŞİD-ə qarşıs uğurunu qeyd edən Tramp terror təşkilatına qarşı mübarizənin sona yaxınlaşdığını bildirib.
Maraqlıdır ki, Trampın açıqlamasından bir qədər sonra mətbuat qarşısında çıxış edən Dövlət Departamentinin sözçüsü Hezer Noyert Trampın məlum bəyanatından xəbərsiz olduğunu deyib.
