BAKI, 13 mart — Sputnik. Bu gün Səbail Rayon İcra Hakimiyyətinin (RİH) başçısı Eldar Əzizov Bayıl yamacında evləri sürüşməyə məruz qalmış vətəndaşlarla görüş keçirib. Sputnik Azərbaycan xəbər verir ki, görüşdə bəzi problemlər dilə gətirilib.
"Evi uçmuş 6 ailə onlara ayrılan kompensasiyanın az olmasından şikayətlənirdi. Bu məsələ yaxın günlərdə öz həllini tapacaq", — deyə E.Əzizov bildirib.
İcra başçısı göstəriş verib ki, uçan 6 ev istisna olmaqla, digər yaşayış evlərinə elektrik enerjisinin verilməsi bərpa edilsin.
Görüşdə daha sonra rayon rəhbəri vətəndaşların suallarını cavablandırıb. Vətəndaşlar sürüşmə ilə bağlı elektrik enerjisinin və qazın kəsilməsindən narahat olduqlarını bildiriblər. İcra başçısı tapşırıq verib ki, əgər sürüşmə zonasında olan evlərdə təhlükə yoxdursa, həmin evlərə elektrik enerjisi və qazın verilməsi bərpa edilsin.
