BAKI, 16 fevral — Sputnik. Ötən il Rusiyada ekstremist cinayətlərin sayı artıb. Sputnik Azərbaycan Rusiya mətbuatına istinadla xəbər verir ki, bu barədə Rusiya prezidenti Vladimir Putin bildirib.
O qeyd edib ki, prokurorların internetdəki qanunazidd kontentlərə malik resursları bloklamaq imkanı yaranan andan internetdə 3000-ə yaxın sayt bağlanıb.
"Əvvəllər olduğu kimi yenə də ekstremizmə qarşı ciddi diqqət ayırmaq lazımdır. Ötən il 2016-cı il ilə müqayisədə belə cinayətlərin sayı 5 faiz artıb", – deyə Putin qeyd edib.
Onun sözlərinə görə, 4 il əvvəl Baş Prokurorluq ekstremist xarakterli informasiyalar olan saytların blok edilməsinə icazə alıb. Və bu illər ərzində 3 min internet səhifəsi blok edilib, 70 mindən çox sayt ekstremist fəaliyyətinə görə silinib.
"Belə sistemli işi ölkəmizi və cəmiyyətimizi təhlükə qarşısında qoyan radikal ideologiyaların yayılmasına qarşı da aparmaq lazımdır”, – prezident bildirib.
