BAKI, 14 fevral — Sputnik. "Dövlət rüsumu haqqında" qanuna dəyişiklik edilir. Sputnik Azərbaycan xəbər verir ki, qanuna dəyişiklik bu gün Milli Məclisin İqtisadi siyasət, sənaye və sahibkarlıq komitəsinin iclasında müzakirə edilib.
Qanun 14-cü maddəsinə dəyişiklik təklif edilir. Dəyişikliyə görə, qanuna 14.3-2-ci maddə əlavə edilib. Əlavəyə görə, 15 yaşı tamam olmamış Azərbaycan vətəndaşına şəxsiyyət vəsiqəsinin verilməsinə və ya dəyişdirilməsinə görə rüsum 10 gün müddətində verildikdə və ya dəyişdirildikdə 4 manat, 3 iş günü müddətində verildikdə və ya dəyişdirildikdə 20 manat, 1 iş günü verildikdə və ya dəyişdirildikdə 25 manat məbləğində müəyyən edilib.
Mövcud qanuna görə, Azərbaycan vətəndaşının şəxsiyyət vəsiqəsinin verilməsinə və ya dəyişdirilməsinə görə, rüsum 10 gün müddətində verildikdə 5 manat, 3 iş günü müddətində verildikdə 25 manat, 1 iş günü müddətində verildikdə isə 35 manat məbləğindədir.
Qeyd edək ki, qanun layihəsi 15 yaşı tamam olmamış Azərbaycan vətəndaşına şəxsiyyət vəsiqəsinin verilməsinə və ya dəyişdirilməsinə görə qanunun 14.3-cü maddəsində nəzərdə tutulan şəxslərdən (15 yaşı tamam olmuş şəxslərdən) daha aşağı məbləğdə dövlət rüsumunun müəyyən olunması məqsədi ilə hazırlanıb.
Dəyişiklik qəbul olarsa, qanun 2019-cu il yanvarın 1-dən qüvvəyə minəcək.
