BAKI, 13 fevral — Sputnik. Türkiyənin Milliyyətçi Hərəkat Partiyasının (MHP) lideri Dövlət Baxçalı (Devlet Bahçeli) son günlər Amerika ilə yaşanan gərginliklə bağlı sərt açıqlamalar verib. Sputnik Azərbaycan "SABAH"-a istinadən xəbər verir ki, o, ABŞ-ın PYD/YPG terrorçularına dəstək verdiyini və bu səbəbdən türk və amerikan əsgərlərinin hər an üz-üzə gələ biləcəklərini bildirib.
"Amerika Vyetnamda yaşadıqlarını hələ də unuda bilmir. Təsirləri illərdir davam edir. 20 milyonluq bir ölkə 200 milyonluq ölkəyə acı yaşatdı. Unutmasınlar ki, Türkiyə onlara Vyetnamın 5 qatını edər", — Baxçalı vurğulayıb.
O, keçən həftə Türkiyə ordusuna aid tankın ABŞ silahı ilə vurulduğu iddiasından da danışıb: "Əgər bu iddia təsdiqlənsə, o zaman Amerika mənim gözümdə qatil dövlət olacaq".
Xatırladaq ki, 1955-ci ildə başlayıb, 1973-cü ildə başa çatan Vyetnam müharibəsi zamanı ABŞ rüsvayçı məğlubiyyət yaşayaraq bölgəni tərk etməyə məcbur olmuşdu.
