BAKI, 8 fevral — Sputnik. “Sosial şəbəkələr seçkiqabağı təşviqat zamanı bəzi problemlər yaradır. Ümumiyyətlə, sosial şəbəkələrin auditoriyası genişdir. Seçki ərəfəsində orada gedən proseslərin izlənməsi mühüm məsələdir”.
“Report”un xəbərinə görə, bunu Mərkəzi Seçki Komissiyasının (MSK) sədri Məzahir Pənahov MSK-nın bu gün keçirilən iclasında deyib.
“Biz demirik kimisə cəzalandıracağıq, amma elə başa düşməsinlər ki, kim nə istəyir edə bilər”, — deyə, MSK sədri əlavə edib.
Pənahov qeyd edib ki, növbədənkənar prezident seçkiləri ilə bağlı MSK br sıra maarifləndirmə tədbirləri həyata keçirəcək.
Qeyd edək ki, Prezident İlham Əliyev “Növbədənkənar Azərbaycan Respublikası Prezidenti seçkilərinin elan edilməsi haqqında” sərəncam imzalayıb. Sərəncamla Mərkəzi Seçki Komissiyasına (MSK) növbədənkənar Azərbaycan Respublikası Prezidenti seçkilərinin 2018-ci il aprelin 11-nə təyin olunmasını və Azərbaycan Respublikasının Seçki Məcəlləsində müəyyən edilmiş qaydada keçirilməsini təmin etmək tapşırılıb. MSK növbədənkənar Prezident seçkilərini aprelin 11-nə təyin edib.
